Monday, December 5, 2022

300. හිතාදර ඇල්ෆා!



ගුඩ් ඊවිනින් හිතාදර ඇල්ෆා!

මං දන්නවා ඔයාලා නිර්භීත සිංහයෝ!

නැත්නම් ව්‍යාඝ්‍රයෝ, දිවියෝ, අහංකාර වෘකයෝ...


ඒත් ;

මේ අපි පුංචි කුරුල්ලෝ....

පියාඹන දේදුණු කැබලි වගෙ ඈතට පෙනෙන,

විඩා නිව නිව - කුඩා ස්වර කූජන කරන,

අපි පුංචි කුරුල්ලෝ....


පැටි වියේදිම මහ වැසිවලට අහුවුන,

පර්වත හිසක හැපී අත්තටු ඇදවුන,

නව යොවුන් වියේ පෙම් මේකුළක ගැටීමෙන්,

එකම පෙණහැල්ලට නිවුමෝනියා වැලඳුණ,

අපි පුංචි කුරුල්ලෝ....


බටිති පිංපොං බෝලයක වුව,

තියෙන්නට පුලුවන් ඇබින්දන් සීරුම්.

සිඟිති බකමූණෙක් කළුවරේ එලියට එන්නේ,

වසංගන්නයි වේදනාබර සීහුම්.

උකුස්සෙක් ඉගිලෙද්දි විසිල් පාරක් ගැහුවට,

දෙමලිච්චො පැන පැන යද්දි ඔච්චම් දුන්නට,

ඔයාලට ලෙහන්නට පුලුවන්ද ඇල්ෆා,

අපේ කූජනවල තේරුම්?


ඔව්, අපි දන්නවා වනන්තර නීතිය,

නීති කඩ කඩ යලි හදන්නේ,

කෙසර ඇති හැඩිදැඩි අය!


වලාකුළු වල හැංගි හැංගී ඉන්නම්,

පලා පෙත්තක් වගේ - ගස් අතරක වෙස්වලා ගන්නම්,

ඇස්වලට ඇන ඇන කරන ඔය 'ඇල්ෆා ආතල්ලෙක' නවත්තා,

ඉතිරි කරනවද අපිටත් - කුරුළු චිත්තප්‍රීතිය?


....................................................................


අමාරුම වෙලාවක ශිඛර මුදුනෙන් ඉකුත් වෙන්නම්,

පපුතුරේ ඉගැඹුරු කැළැල් ගැන වදනකුදු නොදොඩාම ඉන්නම්,

ඒ අතරෙ පුලුවන් තරම් කල් - දේදුන්න ලඟ පියාඹන්නම්,

රැකගන්න ඉඩ දෙන්න අපිටත්

කුරුළු චිත්තප්‍රීතිය!


3 comments: