කඳුළු බිඳුවක දකුණු මායිමෙන්
මුහුදු වතුරට පනින්නට කලින් හවස් ඉර
විඩාබර මා වසාගෙන වැතිරෙයි.
අන්න ඒ වෙලාවේ,
වැලි මාලිගා පාදමක් පාමුල
මට මගේ අනුරූ දෙකක් හමුවෙයි.
මුදු බිලිඳු කොපුලතක
ටැටූ සටහන් අඳියි මුහුදු වැලි
ළමා ගීයක අපිලිවෙල ස්වර ගිලිහෙයි.
මගේ ඇස් - ඇගේ ඇස්
එකට ගැටෙනා සැනින්
කිරි හිනා සිඳු රළක් පිපිරෙයි.
වෙරළ ගැඹරේ එරෙන
අපේ දෙපතුලේ සටහන් මතින්
හයිකු කවි කිහිපයක් මතුවෙයි.
මුහුදු වතුරෙන් පෙඟුණු - ඇගේ කෙහෙරැලි අතර
පලා පැහැ ඇල්ගී ඔටුන්නක් ඇතිරෙයි.
ඉනික්බිත්තේ මගේ හදවතේ නිදා හුන්
අකාලික සිඟිත්තිය ඇහැරෙයි.
මුහුදු වැලි මන්දිරේ - මතු මහල් තලාවේ
සන්තෝසාභිශේක සැනසුම් උළෙල ඇරඹෙයි.
No comments:
Post a Comment