මායා කැඩපතක් වගේ
ඔබ කරන කියන දේ දැනෙන එක
පිටු පෙරලෙන පොතක් වගේ
ඔබ හිතන පතන දේ පෙනෙන එක
දුරක හිටියත් ලඟ එක
ඔබ හිතන්නේ ඒක ආශ්චර්යයක් කියල ද?
පිළිණ සේරම වීසිකර කුණු බඳුනට
අටවෙනි සිගරැට්ටුවෙත් අළු කැඩෙනකොට
මැසෙන්ජර් චැට් කවුළුවක් අස
කැරලි හිසකේ අතරින් තනි ඇසක් වැසෙනකොට
කියන දේ නොකෙරෙනකොට
නොකියන දේ කෙරෙනකොට
නොරිස්සුම් දබරැඟිලි තුඩකින්
ආදරය 'ආකයිව්' වෙනකොට
තවමත් ඔබ හිතන්නේ
ආශ්චර්යයක් කියල ද
පිටු පෙරලෙන පොතක් වගේ
ඔබ හිතන පතන දේ පෙනෙන එක?
කෙරෙන දේ නොකියනකොට
නොකෙරෙන දේ කියනකොට
මට ඒවා පැහැදිලිව පෙනෙනකොට!
තවමත් ඔබ හිතන්නේ
ආශ්චර්යයක් කියල ද
දවස තිස්සෙම අනෝරා වැහි ඇදහැලෙන එක?
No comments:
Post a Comment