Tuesday, August 16, 2022

285. සන්තෝස දූව

 

Drawing by Kaveen Manishka Kariyawasam


සිපුම් පහරක් මැදදි කොපුල් මත ඇදහැලෙන

කෙහෙ කැරලි නීල තුරු වියනයි

දිගු දෙනෙත් අගින් එකවර සැණෙලි නැගෙන්නේ

උණුහුමේ උදාහිරු කිරණයි


සිඟිති පා සලා ගේ පුරා පෙරලෙන දඟය

සරත් වනරොදක සරසරයයි

සියක් කිංකිණි සරින් සැලෙන සුරතල් තෙපුල්

එහි වැයෙන කුරුළු කූජනයයි


කිරි සුවඳ විහිදුවන පුංචි ආදර පොදිය

සඳ සිසිල හදවතට ගෙන්නයි

ඇඟිල්ලක වෙලෙන මුදු මොළොක් අත්ලක පහස

උඳුපියලියක නිදන පින්නයි


දෙපා අතරේ එතී ගුම් නගන ලොම් කැටිය

වෙරළතක බිඳෙන සිඳු රැල්ලයි

පුළුන් කොට්ටා තියා උරහිසට පනින්නේ 

කෙලිකවටකමේ දිය ඇල්ලයි

 

ප්‍රේමයේ තුංග කඳු පවුරයි

ප්‍රීතියේ නැවුම් දිය ඌලයි

සංචරණ සීමාවලට හසු නොවෙන

සංතාපයන් අතුරුදන් කෙරෙන

සන්තෝස දූව මේ මෙතැනයි.....


3 comments: