"නත්තල් සේල් වාසී!"
පාට පත්තිරු අතේ හැප්පෙයි,
රතු හිස්වැසුම ගැස්සෙයි,
විඩාපත් බොර පැහැති දෙනෙතකි,
හිත තිගැස්සෙයි!
"ටිකට් දෙක පන්සීයයි"
සුදු අත්වැසුම් හිතට හිම කැටි නංවයි,
රතු හිස්වැසුම ගැස්සෙයි,
ඩා බිඳිති පිරි තලෙළු නළලකි,
හිත තිගැස්සෙයි!
"අදත් බස් එක මිස් වෙයි"
සුපර් මාර්කට් බිලක් හෙමිහිට කොඳුරයි,
රතු හිස්වැසුම 'තැන්ක් යූ' සරින් නැවෙයි,
සිලි මළුවලට බඩු අහුරයි,
නොරිස්සුම තැවරුණ සිනාවකි,
හිත තිගැස්සෙයි!
"දෙකක් ගත්තොත් එකක් නොමිලේ!"
පේව්මන්ටුව දෙදරයි,
නූල් අග රතු හිස්වැසුම් සුලි කැරකෙයි...
"ඔබ ඉන්නවා මට පේනවා ජේසූ!"
කැරොල් ගීයක් රැව්දෙයි,
විඩාබර නෙත් වමට - දකුණට පෙරළෙයි,
රතු හිස්වැසුම් පමණක්,
දෙසැම්බර් සුළං වැද පැද්දෙයි...
නිර්වින්දිතවු හද,
යළි නොම තිගැස්සෙයි!
No comments:
Post a Comment